Digital Chat Station ləqəbli məşhur çinli insayder Huawei şirkətinin HarmonyOS əməliyyat sistemi barəsində yeni məlumatlar verib. Məlumatda qeyd edilib ki, Huawei mövcud olan smartfonlarını HarmonyOS-ə keçirməkdən əlavə olaraq yaxın zamanda təqdim olunacaq yeni məhsullarında öncədən bu əməliyyat sistemini quraşdıracaq. Yəni başqa sözlə desək, Huawei şirkətinin yeni cihazları artıq HarmonyOS-ə sahib şəkildə satışa çıxacaqlar. İnsayder bildirib ki, bu cür addım artıq şirkətin növbəti yeni smartfon modelini əhatə edəcək.

Apple şirkəti bu ay özünün yeni ARM prosessorunun irimiqyaslı istehsalına start verib. Söhbət, Apple M2 ARM prosessorundan gedir və o, hələ keçən il təqdim olunmuş M1 prosessorunun davamçısı olacaq. Qeyd etmək lazımdır ki, Apple şirkətinin M1 prosessoru artıq MacBook Air, MacBook Pro, Mac mini, iMac və iPad Pro kimi məhsullarda istifadə edilir. Məlumatda qeyd edilib ki, Apple M2 prosessoru 3 ay ərzində Tayvanın TSMC şirkətinin zavodlarında istehsal olunacaq. Əgər hər şey yolunda getsə, yeni prosessorların ilk partiyası yay fəslinin ortasında təhvil veriləcək.

"Lenovo" şirkəti qabaqcıl "ThinkPad X1 Titanium" noutbukunu nümayiş etdirib. Adından da göründüyü kimi, qurğu titan korpusla təchiz edilib. Bundan başqa, şirkət qurğunun "5G" şəbəkələrinə qoşulması imkanının qayğısına qalıb.

 "Lenovo ThinkPad X1 Titanium" noutbuku 11-ci nəsil "Intel Core i5" və ya "i7" prosessorları ilə təchiz ediləcək. Həmçinin noutbuk "Intel EVO" sertifikasiyasına malik olacaq.

İnsayderlərin verdikləri məlumata əsasən Snapdragon 888 prosessorunun Pro versiyası artıq müxtəlif testlərdən keçib və irimiqyaslı istehsal prosesinə keçməyə hazırlaşır. Bununla yanaşı insayderlər bildiriblər ki, Snapdragon 888 Pro prosessoru yalnız Çin istehsalı smartfonlarda quraşdırılacaq. Məlumatda qeyd edilib ki, Qualcomm-un bu yeni prosessoruna sahib smartfonlar bu ilin üçüncü rübündə satışa çıxacaqlar. Snapdragon 888 Pro-nun texniki özəllikləri barəsində məlumat verilməyib. Lakin güman olunur ki, o, adi Snapdragon 888-dən yüksək tezlikdə çalışma özəlliyi ilə fərqlənəcək.

Microsoft şirkəti qrafik interfeysli Linux tətbiqlərinin Windows 10 mühitində işə salınması funksiyasının testinə başlayıb. Sözügedən funksiya Microsoft-un insayder proqramının iştirakçıları üçün artıq aktivdir və heç bir əlavə əməliyyat reallaşdırmadan Linux istifadəçilərinə Windows-da ənənəvi proqram təminatlarından istifadə imkanını verir. WSL alt sisteminin yenilənməsi Linux üçün hazırlanmış istənilən qrafik redaktorları və alətləri işə salmağa şərait yaradır. Bundan əlavə olaraq Microsoft tərtibatçıları GPU-da hardware sürətlənməsi funksiyası ilə mikrofon dəstəyini reallaşdırıblar.