Dünən Xiaomi şirkəti Mi Mix 4 flaqman smartfonu ilə yanaşı digər qeyri-adi məhsulunu təqdim edib. Söhbət, CyberDog adlı dörd ayaqlı robotdan gedir. Bu, Boston Dynamics şirkətinin məşhur Spot robotunun analoqu kimi çıxış edir. Dünənki təqdimat çərçivəsində Xiaomi şirkətinin CEO-su Lei Jun səhnədə sözügedən robota əmrlər verib, robot isə həmin əmrləri yerinə yetirib. Beləliklə CyberDog adlı 4 ayaqlı robot yüksək dəqiqliklə çalışan 11 ədəd sensora sahibdir. Həmin sensorlar məlumatları real zaman ərzində süni zəka sisteminə ötürürlər və süni zəka əldə edilmiş məlumatları emal edir. Bunun sayəsində robot ətraf mühit barəsində məlumatları əldə edə bilir. Buna misal olaraq təsvirləri, səsləri, işığı, məsafəni, sürəti və s. gətirmək olar.

Uzunmüddətli fasilədən sonra Xiaomi şirkəti Mi Pad planşet seriyasının yeni modellərini təqdim edib. Təqdim edilmiş yeni Mi Pad 5 seriyasına 3 planşet modeli daxil olub: Mi Pad 5, Mi Pad 5 Pro və Mi Pad 5 Pro 5G. Mi Pad 5 və Mi Pad 5 Pro modelləri öz aralarında yalnız prosessor, batareya həcmi və arxa kamera sayı ilə fərqlənirlər. Digər bütün özəlliklər hər iki planşetdə eynidir. Planşetin 5G versiyası isə sadəcə olaraq 5G şəbəkə dəstəyi və kamera göstəriciləri ilə fərqlənir. Beləliklə planşetlər 120 Hz-lik təsvir yenilənməsinə sahib 2560x1600 piksel keyfiyyətli 11 düym IPS ekran ilə təchiz olunublar. Planşetlərin ekranları HDR10 və Dolby Vision texnologiyalarını dəstəkləyirlər. Mi Pad 5 Pro modeli həmçinin 8 ədəd səsgücləndiricidən ibarət olan akustika sisteminə sahibdir və Dolby Atmos texnologiyasını dəstəkləyir.

Galaxy Unpacked 2021 təqdimat tədbiri çərçivəsində Samsung şirkəti qatlana bilən Galaxy Z Fold 3 və Galaxy Z Flip 3 smartfonlarını təqdim edib. Gəlin Galaxy Z Fold 3-dən başlayaq. İlk növbədə şirkət yeni qatlana bilən smartfonda əsas diqqəti dözümlülüyə ayırıb. Əvvəlki Galaxy Z Fold modellərində bu məsələ ilə bağlı problemlər var idi və onlar daha tez sıradan çıxırdılar. Lakin yeni Galaxy Z Fold 3 daha dözümlü olub. Xarici görünüş baxımından Galaxy Z Fold 3 əvvəlki modellərdən çox az fərqlənir. Buna baxmayaraq şirkət onu daha kompakt və daha yüngül hala sala bilib. Bununla belə smartfonun ekran ölçüsündə heç bir dəyişiklik olmayıb.

Xiaomi Mi Mix 3-ün satışa çıxmasından 3 il sonra Xiaomi sonunda Mi Mix 4-ü təqdim edib. Bu, ekranın alt hisssinə inteqrasiya edilmiş ön kameralı ilk Xiaomi smartfonudur. Əvvəlki Mi Mix modellərində olduğu kimi yeni smartfonda da şirkət smartfonun dizaynına və flaqman texniki özəlliklərinə diqqət ayırıb. Beləliklə Mi Mix 4-ün gövdəsi keramik materialdan hazırlanıb. Ekran demək olar ön panelin bütün hissəsini əhatə edir və onun kənarları çox cüzi əyilmiş şəkildə reallaşdırılıb. Ekranın üzərində ön kamera üçün heç bir çıxıntı hissə yoxdur. Belə ki, ön kamera ekranın alt hissəsinə yerləşdirilib.

DDoS hücumlar reallaşdıran yeni güclü botnet aşkar edilib. Aşkar edilmiş botnet internet tarixinin ən güclü botnetidir. StormWall şirkətinin mütəxəssisləri qeyd ediblər ki, sözügedən botnetin hücumlarının maksimal gücü saniyədə 2 Tbit təşkil edir. Bu isə mövcud olan bütün botnet hücumları arasında rekord göstəricidir. Aşkar edilmiş yeni botnet 49.000 ədəd cihazdan ibarətdir. Bu cihazlar yalnız serverlərdən ibarətdir. Onların arasında kompüterlər və mobil cihazlar yoxdur. Bu botnet tərəfindən reallaşdırılan hücumlar standart xarakter daşıyırlar və əsasən oyun sektoruna yönəliblər. Aşkar edilmiş botnet UDP, TCP və HTTP protokolları üzrə hücumlar reallaşdırmağı bacarır.