Armorblox adlı İT şirkəti Whatsapp-dakı səsli mesajlar funksiyası kimi maskalanan yeni dələduzluq sxemi barəsində məlumat verib. Aşkar edilmiş yeni dələduzluq sxemi vasitəsilə hackerlər kompüterə zərərli proqram təminatı yükləyərək onun daxilində mövcud olan istifadəçi hesablarını, elektron portmanatların şifrələrini və hətta faylları oğurlayırlar. Hackerlər kompüterlərin hack edilməsi prosesini elektron poçt məktubu vasitəsilə reallaşdırırlar. Onlar tərəfindən göndərilmiş bu cür məktub messencerin rəsmi dəstək xidmətindən olan bildiriş kimi maskalanır və istifadəçiyə səsli mesajın dinlənilməsini təklif edir.

Whatsapp-ın beta versiyasında konfidensiallığın qorunması üzrə yeni funksiya istifadəyə verilib. İstifadəyə verilmiş yeni funksiya avtomatik silinən mesajlar rejimini tamamlayır. Belə ki, bundan sonra avtomatik silinən mesajlar rejiminin işə salındığı çatlarda göndərilən fotolar öz kopyalarını Gallery-də avtomatik olaraq yarada bilməyəcəklər.

Süni zəka sahəsində fəaliyyət göstərən OpenAI adlı qeyri-kommersiya təşkilatı özünün DALL-E adlı neyron şəbəkəsinin yeni versiyasını təqdim edib. Qeyd etmək lazımdır ki, bu neyron şəbəkə sadə mətn təsviri sayəsində fotolar generasiya edə bilir. DALL-E 2 daha geniş imkanlar əldə edib və həmin imkanlar arasında artıq hazır fotolarla çalışmaq bacarığı da var. Yeni alqoritmin əvvəlki versiyadan əsas fərqi ondan ibarətdir ki, o, artıq hazır fotoları redaktə etmək imkanını özündə birləşdirir. Əvvəllər bu neyron şəbəkəsi yalnız mətn təsviri əsasında fotolar çəkə bilirdi.

İnternetdə artıq dəfələrlə məlumat ortaya çıxıb ki, Qualcomm şirkəti Snapdragon 8 Gen 1 Plus prosessoru üzərində çalışır və o, may ayının sonunda təqdim oluna bilər. Gözləntilərə əsasən yeni prosessor Snapdragon 8 Gen 1-in davamçısı olacaq. İndi isə məlumat ortaya çıxıb ki, Qualcomm şirkəti Snapdragon 8 Gen 1 Plus ilə birlikdə Snapdragon 7 seriyasının yeni modelini də təqdim edə bilər. Digital Chat Station ləqəbli məşhur insayderin verdiyi məlumata əsasən Snapdragon 7 seriyasının yeni prosessoru 2.46 GHz tezlikdə çalışan 4 ədəd Cortex-A710 nüvəsi və 1.80 GHz tezlikdə çalışan 4 ədəd Cortex-A510 nüvəsi ilə təchiz olunacaq.

Google şirkəti Play Store-dakı köhnə tətbiqləri gizlətməyə başlayacaq. Bu cür tətbiqlərdən istifadə edən şəxslər üçün onlar hələ də əlçatan olacaqlar. Lakin yeni istifadəçilər sözügedən tətbiqləri tapa və öz cihazlarına quraşdıra bilməyəcəklər. Verilmiş məlumata əsasən Google Play Store-da 3.5 milyon tətbiq mövcuddur. Onlardan çoxu isə artıq uzun müddətdir ki, müasir proqram təminatı tələblərinə cavab vermir. Çox halda bu cür tətbiqlər heç bir təhlükə mənbəyi daşımırlar. Lakin buna baxmayaraq Google şirkəti istifadəçilər üçün ola biləcək riskləri minimuma endirmək istəyir. Beləliklə şirkət bu ilin noyabr ayından başlayaraq köhnə tətbiqləri Google Play Store daxilində gizlətməyə başlayacaq.