Windows 7-nin rəsmi dəstəyinin dayandırılmasına baxmayaraq sözügedən əməliyyat sistemi hələ də çox məşhurdur. Lakin Windows 7 üçün artıq rəsmi təhlükəsizlik yenilənmələri istifadəyə verilmədiyi üçün o, daimi şəkildə hackerlər tərəfindən böyük diqqətə layiq görülür. Qbot adlı troyanın bir neçə müddət bundan öncə aşkar edilmiş təkmilləşdirilmiş versiyası məhz Windows 7 istifadəçiləri üçün nəzərdə tutulub. Bununla belə sözügedən virus kompüterin sisteminə çox maraqlı üsul ilə daxil olur. Windows 7 vasitəsilə çalışan kompüter sisteminin yeni hack üsulu barəsində məlumatı proxylife ləqəbli İT mütəxəssis öz hesabatında təqdim edib.

Çinin texnologiya nəhəngi olan Baidu şirkəti avtonom şəkildə hərəkət edən nəqliyyat vasitələri sahəsinə tədricən daxil olmağa davam edir. Bu istiqamətdə şirkət avtopilot sisteminə sahib yeni taksi modelini təqdim edib. Təqdim edilmiş yeni elektrikli taksi  modeli yaxın gələcəkdə Çində sərnişinlərin daşınması ilə məşğul olacaq. Apollo RT6 EV adlı taksi xarici görünüşcə off-road ilə minivanın sintezini xatırladır. Sözügedən elektromobil çıxarıla bilən sükana sahibdir. Buna görə də o, sürücüsüz olmadan da hərəkət edə bilir. Bu, Baidu şirkətinin 6-cı nəsil pilotsuz avtomobil modelidir. Bu elektromobil 4-cü səviyyəli avtopilot sistemini özündə birləşdirir. Bu isə o deməkdir ki, Apollo RT6 EV öncədən qeyd edilmiş ərazilərdə tamamilə avtonom şəkildə hərəkət edə bilir.

NVIDIA şirkəti Stenford Universiteti ilə birgə əməkdaşlıq çərçivəsində EG3D adlı yeni neyron şəbəkəsi yaradıb. Sözügedən neyron şəbəkəsi ikiölçülü adi təsvirlər əsasında realistik üçölçülü təsvirlər yarada bilir. Məlumata əsasən yaradılmış bu alqoritm mövcud olan digər analoqları həm sürət həm də dəqiqlik baxımından geridə qoyur və bununla yanaşı öz işi üçün o qədər də güclü kompüter tələb etmir. EG3D adlı neyron şəbəkəsi adi insanların, məşhur şəxslərin və hətta heyvanların üzlərini detallı şəkildə yarada bilir. Onun generasiya etdiyi 3D obyektlər bütün perimetr üzrə düzgün həndəsi özəlliklərə sahibdirlər. Lakin alqoritm tərəfindən yaradılan 3D obyektləri oyunlarda və buna bənzər digər layihələrdə hələ istifadə etmək mümkün deyil.

    Samsung-un 3 nanometrlik prosessorları istehsal etməyə başladığı barəsində məlumat şirkətin rəsmi saytında qeyd edilib. Bundan əlavə olaraq Samsung 3 nanometrlik texnoloji prosesin üstünlüklərindən də danışıb. Ümumi olaraq söyləmək olar ki, 3 nanometrlik prosessorlar əvvəlki prosessorlar ilə müqayisədə daha kompakt ölçülü və daha güclü olacaqlar. Bununla yanaşı onlar daha az enerji sərfiyyatına sahib olacaqlar. Şirkətin sözlərinə əsasən 5 nanometrlik prosessorlardan fərqli olaraq yeni nəsil prosessorların sahələrinin 16% daha kiçik olmalarına baxmayaraq onların performansları 23%, enerji effektivlikləri isə 45% yüksələcək. Bu cür prosessorların istehsalında Gate-all-round (GAA) adlı tranzistor arxitekturasından istifadə ediləcək.

 Instagram öz istifadəçilərinin yaşlarını təyin edən yeni üsulları test edir. Onların arasında Yoti adlı şirkətin süni zəka alqoritmləri də var. Həmin alqoritmlər bu və ya digər fotoda əks olunmuş istifadəçinin üzünü skan edərək müəyəyn səviyyədə səhvlə onun yaşını təyin edə bilirlər. Məlumdur ki, Instagram öz platformasından 13 yaşdan aşağı uşaqların istifadə etməsini qadağan edir. Lakin fotoservis heç zaman bu faktorun nəzarətinə ciddi şəkildə yanaşmayıb.