Finlandiyanın telekommunikasiya təchizatlarının istehsalı ilə məşğul olan Nokia şirkəti son 60 ildə ilk dəfə loqosunun dizaynını dəyişdiyini elan edib. Şirkət bildirib ki, o, istifadəçilərin onu yalnız mobil telefon istehsalçısı kimi tanımalarını istəmir. Buna görə də o öz loqosunun dizaynını dəyişib. Qeyd etmək lazımdır ki, Nokia öz mobil telefon istehsalı ilə məşğul olan biznesini 10 il bundan öncə HMD Global şirkətinə təhvil verib. Bununla yanaşı Nokia MWC 2023 sərgisi çərçivəsində yeni strategiyası barəsində də məlumat verib.

“Bakcell” 5G texnologiyasını istifadəyə verib. Hazırda sınaq rejimində fəaliyyət göstərən 5G şəbəkəsi Bakının müxtəlif ərazilərində - Fəvvarələr Meydanında, Xaqani bağında (Molokan bağı) və “Dəniz Mall” ərazisində mövcuddur.

Azərbaycanın ən sürətli mobil şəbəkəsinin təqdimatında 5G texnologiyasını “Huawei”, “Xiaomi”, “OnePlus”, “Poco” və “Vivo” smartfonlarının sahibləri istifadə edə bilər.

“Bakcell” 5G texnologiyadan istifadə edən abunəçilərinə 5GB balans da hədiyyə edir. Yuxarıda adları çəkilən mobil cihaz sahibləri 5G-nin mövcud olduğu ərazilərdə olarkən telefonda *501*1# kodunu yığmalıdırlar.

Google şirkəti süni zəka əsaslı MusicLM adlı alqoritmini təqdim edib. Sözügedən alqoritm istənilən janrda musiqi tərtib etməyi bacarır. Məlumatda qeyd edilib ki, şirkət MusicLM-in təlimatlandırılmasında ümumilikdə 280 000 saat təşkil etmiş müxtəlif audio kontentdən istifadə edib. Google tərəfindən təqdim edilmiş bu süni zəka əsaslı alqoritmin çalışma prosesində olan əsas diqqət çəkən məqam ondan ibarətdir ki, o, müxtəlif musiqi janrlarının və alətlərinin kombinasiyasını reallaşdırmaqla yanaşı həmçinin abstrakt fikirlərin mətn formatında təqdim edilmiş təsvirləri əsasında musiqiləri tərtib edə bilir.

"Microsoft", 'Windows 10 Home" və "Professional" məhsul yükləmə səhifələrində 31 yanvar 2023-cü ilin son satınalma vaxtı olduğunu bildirib.

 Məhsul açarlarının satışı dayandırılsa belə , "Microsoft" "Windows 10"u 14 oktyabr 2025-ci ilə qədər dəstəkləməyə davam edəcək.

"Microsoft"un bu addımı istifadəçiləri "Windows 11"ə keçməyə məcbur etmək üçün atdığı güman olunur.

“CYBER ON” şirkəti tərəfindən aparılan monitorinqə əsasən, 2022-ci il ərzində “.az” ölkə kodlu informasiya resurslarına qarşı çox saylı kiberhücumlar nəticəsində 97 veb-resursa xaker müdaxiləsi halının reallaşdırıldığı müəyyən olunub.

Analizlər, eyni zamanda bu veb-resursların 8-inin təkrar-təkrar hücuma məruz qalmasına baxmayaraq çatışmazlıqlarını aradan qaldırmaq üçün lazımı tədbirləri görmədiyi faktını ortaya çıxarıb.