İnsayderlərin verdikləri məlumata əsasən gələn ay Apple şirkəti növbəti təqdimat tədbirini keçirəcək. Həmin tədbirdə 3 yeni məhsulun təqdim olunacağı gözlənilir. İnsayder Jon Prosser-in sözlərinə əsasən Apple şirkəti gələn ay yenilənmiş iPad Pro planşetini, yeni AirPods qulaqlığını və AirTags axtarış trekerini təqdim edəcək. Qeyd etmək lazımdır ki, AirTags axtarış trekerinin hələ keçən ilin sentyabr ayında iPhone 12 ilə birlikdə təqdim olunması gözlənilirdi. Lakin bu baş verməmişdi. Buna baxmayaraq Samsung şirkəti Apple-dan tez davranaraq, SmartTag adlı axtarış trekerini Galaxy S21 ilə birlikdə təqdim etmişdi.

Keçən ilin avqust ayında ABŞ-ın OnwardMobility adlı şirkəti BlackBerry brendinin geri qayıdışını və bu brendin smartfonlarının istehsalının bərpasını elan etmişdi. İndi isə yeni BlackBerry smartfonu barəsində ilk məlumatlar ortaya çıxıb. Yeni BlackBerry modellərinin istehsalı ilə OnwardMobility şirkəti Foxconn-un tərkibinə daxil olan FIH Mobile Limited şirkəti birlikdə məşğul olacaq. Artıq bu il 5G və fiziki QWERTY klaviatura dəstəkli yeni BlackBerry smartfonu satışa çıxacaq.

Yeni smartfonda QWERTY klaviaturanın rellaşdırılacağı isə o deməkdir ki, şirkət öz diqqətini bu brendin pərəstişkarlarına yönəldib.

Google Photos servisində ödənişli funksiyaların ola biləcəkləri barəsində məlumat sızıntılarından sonra Google şikəti istifadəçilərin fotolarının bulud servisində saxlanması siyasətində dəyişiklik edib. Belə ki, yaxın gələcəkdə Android istifadəçiləri Google Photos servisindəki Gallery bölməsinin yaddaş həcminə nəzarət etməli olacaqlar. Əks halda onlar əlavə daxili yaddaş üçün ödəniş etməli olacaqlar. Google şirkətinin dəstək xidmətinin verdiyi məlumata əsasən 1 iyun 2021-ci il tarixindən başlayaraq bulud servislə sinxronlaşdırılan media kontentlər və Google servisləri vasitəsilə yaradılmış sənəd faylları Google Drive-da 15 GB-lıq limit çərçivəsində yerləşdiriləcəklər.

Heç gözlənilmədən Qualcomm şirkəti yeni Snapdragon X65 adlı 5G modemi təqdim edib. Bu, Snapdragon 888 prosessorlu cihazlara yenicə inteqrasiya edilən Snapdragon X60 5G modeminin davamçısıdır. Təqdim edilmiş yeni prosessorun əsas üstünlüyü isə mobil 5G şəbəkələrində məlumatın ötürülmə sürətinin yüksəlməsidir. Bu yeni modem 5G şəbəkələrində məlumatların saniyədə 10 Gbit sürətlə ötürülməsini təmin edir. Snapdragon X60-da isə bu göstərici saniyədə 7.6 Gbit-dir. Snapdragon X65 modemi Qualcomm 545 adlı 4-cü nəsil yeni mmWave anteni ilə təchiz olunub.