Canalys analitik şirkəti 2021-ci ilin ikinci rübündə smartfon bazarında olmuş vəziyyət barəsində hesabatını təqdim edib. Həmin hesabatda şirkət bu ilin ikinci rübü üzrə ən çox smartfon istehsal etmiş brendlərin adlarını açıqlayıb. Təqdim edilmiş reytinqə əsasən Xiaomi daha çox smartfon istehsal edərək Apple şirkətinin göstəricilərini geridə qoyub. Reytinqin lideri Samsung olaraq qalır. Belə ki, Samsung smartfon bazarının 19%-nə sahibdir. Son rüb ərzində istehsal olunmuş smartfon sayı məsələsində Samsung 15%-lik yüksəliş sərgiləyib.

Qualcomm şirkəti ASUS-un dəstəyi ilə birlikdə hazırladığı ilk smartfonunu təqdim edib. Smartfonda Qualcomm-un ən aparıcı texnologiyalarından istifadə olunub və onun əsas kütləsi Snapdragon insayderləridir. Qualcomm-un sözlərinə əsasən bütün dünyada 1.6 milyon nəfər Snapdragon insayderi mövcuddur. Söhbət, online forumlarda aktiv iştirak edən və Qualcomm-un yeni məhsulları barəsində ilk məlumatları əldə edən insanlardan gedir. Məhz həmin insanlar üçün Qualcomm şirkəti Smartphone for Snapdragon Insiders adlı smartfonunu yaradıb. Sözügedən smartfonun istehsalı ilə ASUS məşğul olur.

İstifadəyə verilməsindən 9 il sonra Google şirkəti Android Jelly Bean əməliyyat sisteminin dəstəyini rəsmi şəkildə dayandıracağını elan edib. Analitiklərin məlumatlarına əsasən minlərlə Android istifadəçisi hələ də sözügedən əməliyyat sistemindən istifadə edir. Avqust ayının sonundan etibarən Android 4.1 və Android 4.2 əməliyyat sistemlərinin istifadəçiləri artıq Google servislərinin yenilənmələrini əldə etməyəcəklər. Android-in bu versiyaları hələ yanvar ayının sonunda dəstəklənməyən əməliyyat sistemləri siyahısına daxil edilmişdilər. Lakin Google köhnə Android versiyaları üçün kritik təhlükəsizlik yenilənmələrini təqdim etməyə davam edirdi.

Microsoft şirkəti Windows 11 əməliyyat sisteminin kompüterlərə quraşdırılması barədə məlumatlar verməyə davam edir. Məlum olub ki, yeni əməliyyat sistemini təkcə Windows 10 deyil həmçinin daha əvvəlki Windows versiyalarının istifadəçiləri də əldə edə biləcəklər. Lakin daha əvvəlki Windows versiyalarının istifadəçiləri bu proses zamanı bir sıra çətinliklər ilə qarşılaşacaqlar. Windows 10 vasitəsilə çalışan və Windows 11-in sistem tələblərinə uyğun olan kompüterlər yeni əməliyyat sistemini sistem ayarları vasitəsilə sadə şəkildə əldə edə biləcəklər.

Ümumdünya İnternet Şəbəkəsinin yaradıcısı Tim Berners-Lee 90-cı illərin əvvəllərində yaratmış olduğu WWW protokolunun mənbə kodunu bir neçə həftə bundan öncə hərracda satışa çıxartmışdı. Protokolun mənbə kodunun hərracda start qiyməti 1000$ təşkil edirdi. Lakin hərracın sonunda həmin mənbə kodu 5 milyon dollardan baha qiymətə satıldı. Qeyd etmək lazımdır ki, protokolun mənbə kodu NFT token şəklində satılırdı. Həmin NFT token özündə internet prototipinin 9555 sətr koddan ibarət faylını, Tim Berners-Lee tərəfindən yazılmış məktubu, kodun yazılmasını əks etdirən 30 dəqiqəlik videonu və rəqəmsal plakatı birləşdirib.