Google Foto indi avtomatik olaraq RAW formatında fotoşəkillər üçün ehtiyat nüsxələri yarada bilər. Belə fotoşəkillər müvafiq işarə ilə qeyd olunur və açıldıqda siz JPEG formatına keçə bilərsiniz.

RAW fotoşəkilləri JPEG-lərdən daha çox yer tutur və əksər istifadəçilərin artıq limitsiz Google Foto yaddaşı yoxdur, ona görə də yeni funksiya hər kəs üçün faydalı olmayacaq.

Hazırda xidmətin RAW-ın buludlara avtomatik yüklənməsini ləğv etmək imkanı yoxdur, lakin ola bilsin ki, belə funksiya sonradan görünəcək.

Whatsapp-da mesajların oxunmasından sonra onların avtomatik olaraq silinmələri funksiyası artıq mövcuddur. İndi isə messencer tərtibatçıları eyni funksiyanın səsli mesajlara tətbiq edilməsi üzərində çalışırlar. Məlumatda qeyd edilib ki, səsli mesajlar üçün View Once funksiyası adi mesajlardakı kimi çalışacaq.

Yəni sözügedən funksiya çərçivəsində göndərilmiş səsli mesaja bir dəfə qulaq asandan sonra həmin mesaj avtomatik olaraq silinəcək.

Google şirkəti istifadəçinin smartfonunu zərərli tətbiqlərdən qorumağa imkan verən təhlükəsizlik tədbirlərini gücləndirib. Bunun üçün şirkət Play Protect funksiyasının çalışma mexanizmini yeniləyib. Belə ki, sözügedən funksiya real zaman ərzində smartfona quraşdırılan tətbiqin skan edilməsi imkanını əldə edib. Bu və ya digər tətbiqin smartfona quraşdırılmasından öncə Play Protect funksiyası istifadəçiyə onun skan edilməsini təklif edəcək.

Skan prosesi çərçivəsində tətbiqdə hər hansısa zərərli faktorun aşkar ediləcəyi halda sistem bu barədə məlumatı istifadəçiyə skan prosesinin sonunda təqdim edəcək.

Bununla belə bu yeni funksiya tətbiqin hansı mənbədən quraşdırılmasından asılı olmayaraq çalışır. Google Play Store və ya kənar tətbiq mağazaları. Google bildirib ki, bundan sonra Play Protect funksiyası tətbiqləri proqram təminatı kodu səviyyəsində analiz edəcək. Yenilənmiş Play Protect ilkin mərhələdə Hindistanda istifadəyə veriləcək. Daha sonra isə bu yeni funksiya digər ölkələrdə də aktiv olacaq.

Whatsapp tərtibatçıları messenceri yeniləyərək ona çoxdan gözlənilən funksiyanı əlavə ediblər. Söhbət bir cihazda eyni anda iki Whatsapp hesabının istifadəsi funksiyasından gedir. Messencerin rəsmi bloqunda Whatsapp-a ikinci telefon nömrəsinin əlavə edilməsi təlimatı yerləşdirilib. Messencerə ikinci telefon nömrəsinin daxil edilməsi üçün messencer daxilində ayarlara keçid edib istifadəçi adının yanındakı işarəyə klikləmək lazımdır.

Lakin onu da qeyd etmək lazımdır ki, bunun üçün mütləq şəkildə əlavə nömrənin SIM kartı və ya eSIM versiyası lazım olacaq. Belə ki, prosesin yekunlaşdırılması üçün həmin nömrəyə xüsusi SMS şifrə göndəriləcək.