Eyndhoven Texnologiya Universitetinin (TU/e) alimləri 4.6 km məsafədə naqilsiz infraqırmızı rabitə kanalı quraraq bu vasitə ilə saniyədə 5.7 Tbit sürətlə məlumat ötürə biliblər. Bu, şəhər mühitində əldə olunmuş ən yüksək naqilsiz optik ötürmə sürətidir və praktiki tətbiqlər üçün böyük potensiala malikdir. Məsələn, kabel infrastrukturunun olmadığı şəraitdə mövcud şəbəkələrə 5G və 6G antenalarının naqilsiz qoşulması üçün istifadə oluna bilər. Yüksəksürətli bağlantı TU/e-nin şimaldakı kampusu ilə Eyndhovenin cənubundakı High Tech Campus (HTC) arasında qurulub.

Instagram Blend adlı yeni funksiyanın istifadəyə verildiyini elan edib. Bu funksiya sizə və dostlarınıza özəl, fərdiləşdirilmiş Reels lentini yaratmağa imkan verir. Blend yalnız dəvətlə aktivləşdirilə bilər və onu ya bir dostla, ya da qrup çatında yaratmaq mümkündür. Fərdi lentlər hər gün yeni məzmunla yenilənir. Siz Blend dəvətini qəbul etdikdən və ya bir qrupa qoşulduqdan sonra çatdakı hər bir şəxs üçün seçilmiş Reels videolarına baxa biləcəksiniz. Qrupdakı biri hər hansı bir Reels-ə reaksiya verdikdə, Instagram sizə bildiriş göndərəcək ki, bu mövzuda DM çatında söhbəti davam etdirə biləsiniz.

İnternetdə sürətlə yayılan yeni və bir qədər narahatedici bir tendensiya ortaya çıxıb. İnsanlar şəkillərdə göstərilən məkanları müəyyən etmək üçün ChatGPT-dən istifadə edirlər. Bu gün OpenAI özünün ən yeni süni zəka modelləri olan o3 və o4-mini-ni təqdim edib. Hər iki model yüklənmiş şəkillər üzərində unikal “məntiqi düşünmə” qabiliyyətinə malikdir. Praktikada bu modellər hətta bulanıq və təhrif olunmuş fotoları kəsə, döndərə və yaxınlaşdıraraq dərin analiz edə bilirlər. Bu şəkil analiz etmə bacarıqları, modellərin vebdə axtarış edə bilmə qabiliyyəti ilə birləşdikdə, onları güclü məkan tapma alətinə çevirir.

Cloud Next konfransında Google şirkətini nümayəndəsi bildirib ki, kodlaşdırma üzrə süni zəka köməkçisi Code Assist artıq yeni süni zəka agentlərini yerləşdirmək qabiliyyətinə malikdir. Bu agentlər Google Docs sənədlərindəki məhsul spesifikasiyalarına əsaslanaraq tətbiqlər yarada və ya kodu bir proqramlaşdırma dilindən digərinə çevirə bilirlər. Code Assist artıq Android Studio mühitində də əlçatan olub və digər proqramlaşdırma mühitlərinə əlavə olunub. Code Assist-də edilən yeniləmələr GitHub Copilot, Cursor və proqramlaşdırma üzrə viral alət olan Devin-in yaradıcısı Cognition Labs kimi şirkətlərin yaratdığı rəqabət təzyiqlərinə cavab olaraq təqdim edilir.

 Amazon səsi emal edə və təbii səslənən nitq yarada bilən Nova Sonic adlı generativ süni zəka modelini təqdim edib. Sürət, nitqin tanınması və danışıq keyfiyyəti üzrə aparılan testlərdə Nova Sonic özünü OpenAI və Google-un qabaqcıl səs modelləri ilə müqayisədə rəqabətədavamlı model kimi göstərib. Nova Sonic - Amazon-un ChatGPT-nin səs rejimi kimi yeni səs əsaslı süni zəka modellərinə cavabıdır. Bu modellər əvvəlki Alexa versiyalarından fərqli olaraq daha təbii ünsiyyət formatları təklif edirlər. Son illərin texnoloji irəliləyişləri Alexa və Apple Siri kimi köhnə rəqəmsal köməkçiləri insanla qarşılıqlı əlaqədə daha təbii edən modellərə çevirməyə imkan verib. Nova Sonic modeli Amazon-un korporativ süni zəka tətbiqləri üçün təklif etdiyi Bedrock platforması vasitəsilə əlçatandır.