Microsoft şirkəti Windows 11 əməliyyat sisteminin kompüterlərə quraşdırılması barədə məlumatlar verməyə davam edir. Məlum olub ki, yeni əməliyyat sistemini təkcə Windows 10 deyil həmçinin daha əvvəlki Windows versiyalarının istifadəçiləri də əldə edə biləcəklər. Lakin daha əvvəlki Windows versiyalarının istifadəçiləri bu proses zamanı bir sıra çətinliklər ilə qarşılaşacaqlar. Windows 10 vasitəsilə çalışan və Windows 11-in sistem tələblərinə uyğun olan kompüterlər yeni əməliyyat sistemini sistem ayarları vasitəsilə sadə şəkildə əldə edə biləcəklər.

Ümumdünya İnternet Şəbəkəsinin yaradıcısı Tim Berners-Lee 90-cı illərin əvvəllərində yaratmış olduğu WWW protokolunun mənbə kodunu bir neçə həftə bundan öncə hərracda satışa çıxartmışdı. Protokolun mənbə kodunun hərracda start qiyməti 1000$ təşkil edirdi. Lakin hərracın sonunda həmin mənbə kodu 5 milyon dollardan baha qiymətə satıldı. Qeyd etmək lazımdır ki, protokolun mənbə kodu NFT token şəklində satılırdı. Həmin NFT token özündə internet prototipinin 9555 sətr koddan ibarət faylını, Tim Berners-Lee tərəfindən yazılmış məktubu, kodun yazılmasını əks etdirən 30 dəqiqəlik videonu və rəqəmsal plakatı birləşdirib.

Aprel ayında məşhur LinkedIn platformasına kiberhücum reallaşdırılmışdı. Həmin kiberhücum nəticəsində 500 milyon LinkedIn istifadəçisinin məlumatları sızdırılmışdı. Həmin hal yenidən təkrarlanıb. Lakin bu dəfə 700 milyon istifadəçinin məlumatları sızdırılıb. Kibertəhlükəsizlik sahəsində fəaliyyət göstərən mütəxəssislərin verdikləri məlumata əsasən 700 milyon LinkedIn istifadəçisinin məlumatları hackerlər üçün nəzərdə tutulmuş məşhur RaidForums adlı forumda ortaya çıxıblar. Privacy Sharks adlı şirkətin analitikləri “GOD User TomLiner” ləqəbli istifadəçi tərəfindən həmin foruma yerləşdirilmiş məlumatlar bazasını analiz ediblər.

İPhone-nun sistem boşluqları siyahısına yeni bug əlavə olunub. Məlum olub ki, iOS yenilənməsinin özəllikləri səbəbilə müəyyən ada sahib Wi-Fi şbəkəsinə qoşulmaq öz növbəsində iPhone-nun naqilsiz modulunu sıradan çıxarda bilər. Nəticədə bu problem smartfonu internetdən məhrum edir. Xoş xəbər ondan ibarətdir ki, bu problemi aradan qaldırmaq elə də çətin deyil və nəticədə istifadəçi məlumatlarının itirilməsi halı yaşanmır. Məlumata əsasən %p%s%s%s%s%n simvollar kombinasiyasından ibarət ada sahib şəbəkəyə qoşulan zaman iPhone-da Wi-Fi modul deaktiv olur.

Yaxın zamanda Whatsapp istifadəçiləri smartfonla aktiv sinxronlaşdırma olmadan da messenceri həm kompüterdə həm də digər cihazlarda istifadə edə biləcəklər. Lakin məlum olub ki, məşhur messencerin bu yeni funksiyası məhdud şəkildə çalışacaq. İnsayderlər Whatsapp-ın test versiyasını incələyərək bu xəbəri veriblər. Qeyd etmək lazımdır ki, yaxın zamanda Whatsapp-dakı istifadəçi hesabını 4 müxtəlif cihazda işə salmaq mümkün olacaq. Lakin məlum olub ki, 4 cihazdan yalnız 1-i smartfon ola bilər. Bununla da istifadəçi öz hesabının digər cihazlar üçün dublikatını yarada bilməyəcək. Bunun əvəzinə istifadəçi kompüter (Whatsapp Web və Whatsapp Desktop) və Facebook-un Portal cihazları üçün olan müstəqil Whatsapp tətbiqlərindən istifadə etməli olacaq.