OpenAI ChatGPT-də istifadəçilərə müxtəlif məhsulları birbaşa platforma üzərindən almağa imkan verəcək bir sistem tətbiq etməyi planlaşdırır. Bu sistem vasitəsilə sifarişləri birbaşa internet mağazalarının saytlarına keçid etmədən rəsmiləşdirmək mümkün olacaq. ChatGPT üzərindən sifariş qəbul edən satıcılar hər əməliyyat üçün OpenAI-ya komissiya ödəyəcəklər. Məlumata  görə, bu yanaşma OpenAI-nin yeni monetizasiya strategiyasının bir hissəsidir. Şirkət indiyədək əsasən premium abunəliklər vasitəsilə gəlir əldə edirdi.

Qeyri-kommersiya təşkilatı olan Internet Matters tərəfindən yayımlanmış son hesabatda qeyd olunur ki, uşaqlar və yeniyetmələr arasında ChatGPT, Character.AI və MyAI kimi böyük dil modellərindən dostluğu və ünsiyyəti təqlid etmək məqsədilə istifadə halları sürətlə artır. Bu hal tədqiqatçıların və valideynlərin diqqətini cəlb edir, çünki gənclərin sosial münasibətləri və psixi sağlamlığı ilə bağlı mühüm aspektlərə təsir göstərir. 9-17 yaş arası 1000 uşaq arasında aparılmış araşdırmada müəyyən edilib ki, respondentlərin təxminən 67%-i süni zəkaya əsaslanan çat-botlardan mütəmadi istifadə edir.

Apple-ın əldə etdiyi yeni patent klaviatura və siçan konseptini tək parçada birləşdirməyi hədəfləyir. Bu yeni sistemdə klaviaturadakı düymə çıxarıla və siçan kimi istifadə edilə bilər. Şirkətin yeni patentinə əsasən, klaviaturadakı açarı çıxarıb kiçik siçan kimi istifadə etmək olar. MacBook-larda biz həm açar, həm də siçan kimi fəaliyyət göstərən xüsusi düyməni görəcəyik. Apple-ın “Deployable Key Mouse” adlandırdığı bu sistem klaviaturadakı adi düyməni çıxarıb kiçik siçana çevirmək məntiqinə əsaslanır. Mövqe sensoru olan bu düymə kursoru masanın üzərində hərəkət etdirərək idarə etməyə imkan verəcək.

Şirkətin Android Ekosisteminin rəhbəri Sameer Samat Android və ChromeOS əməliyyat sistemlərinin vahid platforma altında birləşdiriləcəyini açıqlayıb. Beləliklə, ABŞ mərkəzli Google nəhayət gözlənilən elanı edərək ChromeOS və Android sistemlərinin birləşməsini açıqlayaraq bütün diqqətləri öz üzərinə cəlb edib. Təfərrüatlar hələ dəqiqləşdirilməyib, lakin yeni inkişaf şirkətin funksiyaların inkişaf etdirilməsi prosesini əhəmiyyətli dərəcədə surətləndirə bilir.

May ayının ortalarında Kaliforniya ştatının Berkli şəhərində 30 tanınmış riyaziyyatçı OpenAI şirkətinə məxsus o4-mini adlı çat-botun riyazi qabiliyyətlərini sınamaq üçün bir araya gəlib. 2 gün ərzində onlar bu süni zəkanı professor səviyyəsində suallarla sınağa çəkiblər və müəyyən ediblər ki, bu süni zəka sistemi son dərəcə çətin riyazi məsələləri həll edə bilir və artıq dünyanın ən yaxşı magistratura tələbələrinin əksəriyyətini qabaqlayır. Böyük dil modelləri (BDM) cümlədə növbəti sözün nə olacağını proqnozlaşdırma qabiliyyətinə malikdirlər.