Microsoft şirkəti elan edib ki, o, Bing axtarış sisteminin süni zəka əsaslı çat-botuna yenicə istifadəyə verilmiş DALL-E 3 neyron şəbəkəsini inteqrasiya edəcək. Qeyd etmək lazımdır ki, DALL-E 3 mətn formatında təsvirlər əsasında fotoların tərtib edilməsi üçün nəzərdə tutulmuş DALL-E adlı neyron şəbəkəsinin yeni versiyasıdır. Yaxın zamanda ChatGPT çat-botunun ödənişli versiyası olan ChatGPT Plus-a inteqrasiya ediləcək DALL-E 3 sistemi istifadəçilərin sorğularını daha yaxşı anlayır və DALL-E 2-dən fərqli olaraq fotoları daha dəqiq və detallı şəkildə tərtib edə bilir.

Made on Youtube tədbiri çərçivəsində dünyanın ən məşhur videoservisi kontent yaradıcıları üçün bir neçə maraqlı yeniliyi anons edib. Daha əvvəlcədən də gözlənildiyi kimi yaxın zamanda Youtube-da əksər videolar neyron şəbəkələri vasitəsilə tərtib olunacaqlar. Hal hazırki mərhələdə reallaşdırılacaq əsas yeniliklər arasında videolar üçün müxtəlif fonların və fotoların, yeni videolar üçün ideyaların və sxemlərin tərtibatı və videoların digər dillərə dublaj olunması funksiyaları olacaq.

İnternetdə Qualcomm əməkdaşı ilə şirkət partnyoru və ya sifarişçisi arasındakı yazışmanın bir hissəsi olduğu iddia edilən foto ortaya çıxıb. Ortaya çıxmış fotodan belə qənaətə gəlmək olar ki, Qualcomm şirkəti eyni ada sahib iki müxtəlif flaqman prosessoru təqdim etməyə hazırlaşır. Məlumata əsasən Qualcomm Snapdragon 8 Gen 3 prosessorunu 2 müxtəlif texnoloji prosesin istesahlı ilə hazırlayacaq.

Söhbət, TSMC şirkətinin 4 nanometrlik və 3 nanometrlik texnoloji proseslərindən gedir.

Görünür, Elon Musk-ın Neuralink şirkəti öz beyin implantını insanlar üzərində test etməyə artıq hazırdır. Belə ki, şirkət öz saytında bu prosesdə iştirak edəcək könüllülərin axtarışı ilə bağlı elan yerləşdirib. Elanda könüllülərə olan tələblər və təcrübədə nələrin olacaqları qeyd edilib. Şirkətin Neuralink N1 adlı çipi qəpik ölçüsündə olan çipdir və o, 64 ədəd nazik elektrod vasitəsilə birbaşa beyinə qoşulur. 64 elektroddan hər biri isə beyində hərəkət niyyətindən cavabdeh olan hissələrə yeridilir.

Google şirkəti özünün Chrome brauzeri üçün iki yeni təhlükəsizlik funksiyası üzərində çalışır. Sözügedən funksiyalar Chromium Gerrit adlı platformada aşkar edilib. Funksiyalardan biri istifadəçilərə konfidensiallıq ayarları üçün rahat paneli təqdim edəcək, digəri isə istifadəçiləri veb saytların izlənməsindən qoruyacaq. Məlumatda qeyd edilib ki, Google şirkətinin təhlükəsizlik sistemi cookie fayllarının zərərsizləşdirilməsinə yardımçı olacaq.