Ötən ay dövlət qurumlarına 140-dan çox kiberhücum indikatoru müəyyən edib

Cari ilin yanvar ayında Xüsusi Rabitə və İnformasiya Təhlükəsizliyi Dövlət Xidməti dövlət qurumlarına 142 kiberhücum indikatoru (IOC) müəyyən edib.

Bu göstərici ötən ilin müvafiq dövrü ilə müqayisədə 45 faiz artıb.

Belə ki, kibertəhdidlərin 43-ü daxili araşdırma, 99-u isə dövlət qurumlarından daxil olmuş insidentlərin araşdırılması əsasında müəyyən olunaraq bloklanıb. Hesabat dövründə “AzStateNet” şəbəkəsi üzrə 46,565 milyon zərərli keçid, son istifadəçilərdə quraşdırılan mərkəzi antivirus sistemi vasitəsilə 337 min, “Sandbox” mühafizə sistemi vasitəsilə isə 19 383 zərərverici tərkibli elektron sənəd blok edilib.

 XRİTDX-nin apardığı audit/pentest yoxlamaları və monitorinqlər nəticəsində dövlət qurumlarının 58 informasiya resursunda təhlükəsizlik boşluqları aşkarlanaraq, aradan qaldırılması üçün müvafiq bildirişlə dövlət qurumlarına göndərilib. Bu göstərici ötən ilin müvafiq dövrü ilə müqayisədə 15 faiz azdır.