Google tarixin ən güclü DDoS hücumunun qarşısını alıb
Google şirkəti tarixdə baş vermiş ən güclü DDoS hücumun qarşısını aldığı barəsində məlumat verib. Məlumatda qeyd edilib ki, sözügedən DDoS hücum avqust ayında baş verib. Baş vermiş DDoS hücum çərçivəsində 1 saniyə ərzində 398 milyon sorğu göndərilib. Bu isə keçən il qeydə alınmış DDoS hücum rekordundan 7.5 dəfə daha güclü DDoS hücum olub. Belə ki, keçən ilki ən güclü DDoS hücum çərçivəsində 1 saniyə ərzində göndərilmiş sorğuların sayı 46 milyon təşkil etmişdi. Müqayisə üçün qeyd etmək lazımdır ki, 2 dəqiqəlik kiberhücum zamanı bu ilin bütün sentyabr ayı üzrə Wikipedia-da oxunmuş məqalələrin sayından daha çox sorğu generasiya edilib. Kiberhücumun son dalğası avqust ayının sonunda start götürüb və indiyənə kimi davam edir. Reallaşdırılan kiberhücum Google servisləri, Google Cloud şəbəkəsi və Google tətbiqləri kimi böyük infrastruktur resurslarına hədəflənib. Google öz növbəsində yüklənmənin bərabər şəkildə paylanmasının qlobal infrastrukturu sayəsində öz servislərinin iş proseslərini stabil saxlaya bilib.
